İkinci Qarabağ müharibəsinin XTQ qazisi Qismət Əliyev

Azərbaycan Ordusunun Xüsusi Təyinatlı Qüvvələrinin keçmiş giziri, qazi Əliyev Qismət Nəsib oğlu 8 may 1998-ci ildə Yardımlı rayonunun Gərsəva kəndində anadan olub. Orta təhsilini Yardımlı rayonunun Şəfəqli kəndində şəhid Səyyar Aslanoğlu Şabiyevin adını daşıyan məktəbdə alıb. Uşaqlıqdan hərb sahəsinə və Xüsusi Təyinatlı Qüvvələrə maraq göstərən Qismət Əliyev məktəbi bitirdikdən sonra hərbi xidmətə başlayıb. O, 2016–2017-ci illərdə Beyləqan rayonunda yerləşən N saylı hərbi hissədə xidmət edib. 2017-ci ildən “Yaşma”nın ön xətt briqadasında xidmətə başlayıb və həmin il Xüsusi Təyinatlı Qüvvələrin kursuna qəbul olunub. Daha sonra Cəlilabad rayonunda yerləşən N saylı hərbi hissədə müddətdən artıq həqiqi hərbi xidmət edən hərbi qulluqçu kimi xidmətini davam etdirib. Müharibəyə qədər müxtəlif hərbi təlimlərdə iştirak edib. Qismət Əliyev Xüsusi Təyinatlı Qüvvələrdə xidmətin çətin olduğunu, lakin bu peşəni sevən insan üçün həmin çətinliklərin şərəf və amal məsələsinə çevrildiyini bildirir. Onun sözlərinə görə, təlimlərin böyük hissəsi dağlıq ərazilərdə keçirilib, həm quruda, həm də dənizdə müxtəlif istiqamətlər üzrə hazırlıq keçiblər. Təlimlər zamanı əsas məqsəd şəxsi heyətin istənilən anda döyüşə hazır vəziyyətdə saxlanılması olub. Qismət Əliyev snayper kursunu da bitirib. Lakin manqa komandiri olduğu üçün əsas silahı avtomat olub. O, snayperlərin mürəkkəb tapşırıqlara hazırlaşdığını və təlimlər zamanı 1800–2000 metr məsafədə yerləşən hədəflərin vurulduğunu qeyd edir. 2020-ci il sentyabrın 27-də İkinci Qarabağ müharibəsi başlayanda Qismət Əliyev ilk gündən döyüşlərə qatılıb. Sentyabrın ilk günlərində Kəlbəcər istiqamətində, daha sonra isə Füzuli və Cəbrayıl istiqamətlərində gedən döyüşlərdə iştirak edib. O, döyüş yoldaşları ilə birlikdə ağır döyüşlərdən keçib. Qismət Əliyevin sözlərinə görə, bir sıra döyüşlərdə onların şəxsi heyəti sayca üstün düşmən qüvvələri ilə qarşılaşıb. Bu döyüşlər zamanı onun silahdaşları Əlmuradov Orxan, Cəfərov Vüqar, Süleymanov Rauf, Qurbanov Rəcəb, Kazımov Kamran və Mustafayev Nicat şəhid olublar. Qismət Əliyev oktyabrın 10-da düşmənin pusqusuna düşdükləri döyüşü də xatırlayır. Həmin qarşıdurma zamanı döyüş yoldaşı Üsüfov Şəhadət onun qucağında şəhid olub. Qismət Əliyev isə düşmənin snayper atəşi nəticəsində üç yerdən yaralanıb. Yaralanmasına baxmayaraq, döyüşü təxminən iki saat davam etdirib. Daha sonra təxliyə edilərək əvvəlcə Füzuliyə, oradan isə Mingəçevir hospitalına aparılıb. Qismət Əliyev Gəncə və Bakıda müalicə alıb, daha sonra müalicəsini Türkiyədə davam etdirib. Hazırda müharibə zamanı aldığı yaralardan sonra həyatını davam etdirir. Döyüşlərdə göstərdiyi xidmət və şücaətə görə Qismət Əliyev Azərbaycan Prezidenti, Ali Baş Komandan İlham Əliyevin sərəncamları ilə “Vətən uğrunda”, “Kəlbəcərin azad olunmasına görə” və “Cəbrayılın azad olunmasına görə” medalları ilə təltif edilib.