WUF13 çərçivəsində keçirilən "Böhranların bərpası və yenidənqurulmasının mərkəzində mənzil təminatı" adlı sessiya

Ümumdünya Şəhərsalma Forumunun 13-cü sessiyası (WUF13) çərçivəsində "Böhranların bərpası və yenidənqurulmasının mərkəzində mənzil təminatı" adlı sessiya keçirilir. Tədbirdə çıxış edən Prezidentin Ağdam, Füzuli və Xocavənd rayonlarında xüsusi nümayəndəsi Emin Hüseynov bildirib ki, bu gün Azərbaycan regionun ən böyük yenidənqurma və geridönüş proqramlarından birini həyata keçirir. Onun sözlərinə görə, 30 il ərzində işğal altında olan Azərbaycan torpaqları dağıdılıb və bəzi rayonlarda dağıntının miqyası son dərəcə böyük olub. Xüsusi nümayəndə əlavə edib ki, ailələr təhlükəsiz şəkildə evlərinə qayıdanda məktəblər yenidən açılır, yerli iqtisadiyyat canlanır, sosial əlaqələr bərpa olunur. Onun fikrincə, azad olunmuş ərazilərdəki yenidənqurma işləri zamanı keçmiş dövrə xas çatışmazlıqlar təkrarlanmamalı və bu səbəbdən, daha yaxşı, daha "ağıllı" və daha dayanıqlı şəhər sistemləri qurulmalıdır.