Bakıda U-17 dünya çempionatının açılış mərasimi
Milli Gimnastika Arenasında 17 yaşadək güləşçilər arasında dünya çempionatının açılış mərasimi keçirilib. Azərbaycan Dövlət Himni ilə başlayan tədbirdə Azərbaycan Güləş Federasiyasının prezidenti Mikayıl Cabbarov, gənclər və idman naziri Fərid Qayıbov, Milli Olimpiya Komitəsinin vitse-prezidenti Çingiz Hüseynzadə və Dünya Güləş Birliyinin (UWW) prezidenti Nenad Laloviç iştirak ediblər. Çıxış edən rəsmilər Prezident İlham Əliyevin rəhbərliyi ilə ölkədə idmanın sürətlə inkişaf etdiyini, Bakının nüfuzlu beynəlxalq yarışlara uğurla ev sahibliyi etdiyini və bu turnirin gənc idmançıların təcrübə qazanmasında böyük rol oynayacağını vurğulayıblar. UWW prezidenti Nenad Laloviç isə yarışın yüksək səviyyəli təşkilinə və göstərilən dəstəyə görə Azərbaycan tərəfinə təşəkkür edib. Rəsmi hissədən sonra ölkələrin bayraqları parade çıxarılıb və mərasim bədii proqramla davam edib. Qeyd edək ki, çempionatda 60-dan çox ölkədən 700-ə yaxın yeniyetmə idmançı mübarizə aparır. Azərbaycanı turnirdə 29 güləşçi təmsil edir.
