Paytaxtda yeni açılan Bakı İllüziya Muzeyi

Bakı İllüziya Muzeyi Azərbaycanda bu konseptdə ilk yaradılmış interaktiv və əyləncəli məkanlardan biridir. Muzey ziyarətçilərə reallıq və illüziya arasındakı sərhədləri fərqli formada hiss etdirmək üçün xüsusi dizayn olunub. Üç mərtəbədən ibarət muzeydə ümumilikdə 20 müxtəlif tematik otaq mövcuddur. Burada ziyarətçilər üçün bir-birindən maraqlı və fərqli illüziya zonaları yaradılıb. Otaqlar arasında "Ames" otağı, "Sonsuzluq" otağı, güzgü labirinti, "Vortex" tuneli, 3D illüziya otaqları, perspektiv otaqları və digər vizual effektlərlə zəngin məkanlar yer alır. Hər otaq insan beynini "aldadan" xüsusi effektlərlə hazırlanıb və ziyarətçilərə həm əyləncə, həm də öyrədici təcrübə təqdim edir. Muzey hər gün saat 10:00-dan 20:00-dək fəaliyyət göstərir və gün ərzində ziyarətçiləri qəbul edir. Gələn qonaqların rahatlığı üçün burada Azərbaycan, rus və ingilis dillərində danışan peşəkar bələdçilər fəaliyyət göstərir. Bundan əlavə, muzeyin terras hissəsində yerləşən kafeteriya ziyarətçilərə istirahət etmək, qəhvə içmək və şəhər mənzərəsindən zövq almaq imkanı yaradır. Bakı İllüziya Muzeyi ailələr, gənclər və turistlər üçün unikal bir məkan olmaqla yanaşı, fərqli foto və video çəkiliş imkanları ilə də seçilir. Buraya gələn hər kəs həm əylənir, həm də yaddaqalan vizual təcrübə yaşayır.