AMB

Azərbaycan Mərkəzi Bankı (AMB) ölkənin pul-kredit siyasətini müəyyən edən və həyata keçirən, eyni zamanda maliyyə sabitliyini təmin edən mərkəzi dövlət bankıdır. AMB-nin fəaliyyətinin əsas məqsədi qiymət sabitliyinə nail olmaqdır. Bu məqsədinə xələl gətirmədən, Bank həmçinin maliyyə bazarlarında sabitliyi və dayanıqlığı təmin edir. 1992-ci ildə yaradılan AMB-nin əsas funksiyalarına milli valyutanın – manatın emissiyası (buraxılması), nağd pul dövriyyəsinin təşkili, manatın xarici valyutalara nisbətdə rəsmi məzənnəsinin müəyyən edilməsi, habelə beynəlxalq qızıl-valyuta ehtiyatlarının saxlanması və idarə edilməsi daxildir. Bundan əlavə, Mərkəzi Bank ödəniş sistemlərinin fəaliyyətini tənzimləyir və onlara nəzarət edir, eyni zamanda maliyyə bazarlarında istehlakçıların hüquqlarının qorunması və maliyyə savadlılığının artırılması sahəsində işlər aparır. AMB-nin fəaliyyəti "Azərbaycan Respublikasının Mərkəzi Bankı haqqında" Qanunla tənzimlənir.