Beynəlxalq Əmək Təşkilatı (BƏT)

Beynəlxalq Əmək Təşkilatı (BƏT) (International Labour Organization – ILO) 1919-cu ildə təsis edilmiş və Birləşmiş Millətlər Təşkilatının (BMT) yeganə üçtərəfli ixtisaslaşmış agentliyidir. Üçtərəfli olması o deməkdir ki, BƏT-in qərar qəbul etmə prosesində hökumətlər, işəgötürənlər və işçilərin nümayəndələri bərabər şəkildə iştirak edir. Təşkilatın əsas missiyası bütün dünya üzrə sosial ədalətin və beynəlxalq səviyyədə tanınmış insan və əmək hüquqlarının təşviqi və həyata keçirilməsidir. BƏT-in əsas fəaliyyəti Layiqli Əmək (Decent Work) konsepsiyasına əsaslanır. Bu konsepsiya hər kəs üçün azad, bərabər, təhlükəsiz və insan ləyaqətinə uyğun məhsuldar işin təmin olunmasını əhatə edir. BƏT əmək standartlarını müəyyən edir, proqramlar həyata keçirir və texniki yardım göstərir. Təşkilatın fəaliyyəti uşaq əməyinə son qoyulması və əməyin təhlükəsizliyinin artırılması kimi qlobal məsələlərə yönəlmişdir.