Əli Əliyev (geoloq)

Əli Əliyev 19 noyabr 1959-cu il təvəllüdlü, Azərbaycanın tanınmış dağ mühəndisi-geofiziki və dövlət qulluqçusudur. O, 1985-ci ildə Azərbaycan Neft və Kimya İnstitutunu (indiki ADNSU) geofizik ixtisası üzrə bitirmişdir. Əli Əliyev əmək fəaliyyətinə 1985-ci ildə Azərbaycan Geologiya İdarəsinin Geofiziki Ekspedisiyasında başlamışdır. 1985-1991-ci illərdə Böyük Qafqazın dərinlik geoloji-tektonik quruluşunun öyrənilməsi layihələri üzərində işləmişdir. O, 1991–2002-ci illərdə Geologiya İdarəsinin müxtəlif bölmələrində baş geofizik kimi çalışmışdır. 1994-1995-ci illərdə isə Türkiyənin Ərzurum Atatürk Universitetində də iş təcrübəsi qazanmışdır. 2002-ci ildən Ekologiya və Təbii Sərvətlər Nazirliyi (ETSN) sistemində çalışmışdır. O, Milli Geoloji Kəşfiyyat Xidmətinin (MGKX) Geoloji monitorinq mərkəzində baş geofizik, daha sonra 2006-cı ildən etibarən Mərkəzin direktoru vəzifəsini icra etmişdir. 2019-cu ildən MGKX-nin Kompleks Planlama İdarəsinin rəisi–baş geoloq vəzifəsinə təyin olunmuşdur. 01 dekabr 2020-ci il tarixindən isə Milli Geoloji Kəşfiyyat Xidmətinin rəisi vəzifəsində fəaliyyət göstərir. O, Azərbaycan Geofizikləri və Seysmoloqlar Assosiasiyasının üzvü, 50-dən artıq elmi məqalənin müəllifi və “Azərbaycanın Tektonikası (IV cild)” kitabının həmmüəlifidir. Dövlət qarşısında xidmətlərinə görə, 2020-ci ildə Azərbaycan Respublikası Prezidentinin Sərəncamı ilə “Əməkdar mühəndis” fəxri adı verilmişdir.