janqlyor

Janqlyorluq və ya Hoqqabazlıq (Juggling) müəyyən sayda əşyanın (ən azı birinin) davamlı olaraq havada atılıb tutulması ilə nümayiş etdirilən sirk və ya səhnə sənətidir. Latın köklü olub Fransız dilindən keçən "Janqlyor" (Jongleur) sözü bu sənəti icra edən şəxsə deyilir. Janqlyorlar adətən top, halqa, bita, hətta yanan butulkalardan istifadə edirlər.Bu sənətin tarixi Qədim Misirə qədər gedib çıxır. Orta əsrlərdə feodal qəsrlərində və teatr dünyasında peşə kimi formalaşmışdır. İntibah dövründən etibarən isə Avropada geniş yayılmışdır. Janqlyorluq təkcə tamaşaçılar üçün əyləncə deyil, həm də icra edən şəxsin koordinasiya, reaksiya sürəti və konsentrasiya bacarıqlarını inkişaf etdirən bir hobbi və ya idman növü kimi də məşhurdur. Hazırda bu sənət beynəlxalq festivallarda və müasir sirk proqramlarında öz aktuallığını qoruyur.