Mariya Stadnik

Mariya Stadnik həm Azərbaycan, həm də dünya idman tarixinin ən titullu qadın güləşçilərindən biridir. 10 qat Avropa və 2 qat dünya çempionu, dörd Olimpiya Oyununun mükafatçısı olan Stadnik, hazırda Azərbaycan Güləş Federasiyasında (AGF) qadın güləşi üzrə koordinator vəzifəsini icra edir. Onun əfsanəvi karyerası gənc qadın güləşçilər üçün böyük motivasiya mənbəyidir. Koordinator kimi Mariya Stadnik ölkədə qadın güləşinin inkişaf strategiyasının hazırlanmasında, milli komandanın hazırlıq səviyyəsinin artırılmasında və beynəlxalq təcrübənin tətbiqində yaxından iştirak edir. O, məşqçi heyəti ilə idmançılar arasında effektiv koordinasiyanı təmin edərək, qızların peşəkar güləşə cəlb olunması və onların beynəlxalq arenalarda uğur qazanması üçün çalışır. Stadnikin həm aktiv idmançı, həm də idarəçi kimi fəaliyyəti Azərbaycanın qadın güləşindəki liderlik mövqeyini möhkəmləndirir.