#rövşən məmmədov
Rövşən Məmmədov
Rövşən Raqif oğlu Məmmədov (d.t. 1979) – Azərbaycanın tanınmış jurnalisti, filologiya elmləri doktoru və "Azərbaycan Televiziya və Radio Verilişləri" Qapalı Səhmdar Cəmiyyətinin (AzTV QSC) sədridir. O, 15 yanvar 2019-cu ildən bu vəzifənin icrasına başlamış və 4 sentyabr 2019-cu il tarixində Azərbaycan Respublikası Prezidentinin Sərəncamı ilə sədr təyin edilmişdir.
Rövşən Məmmədov 1996-2000-ci illərdə Bakı Dövlət Universitetinin (BDU) Jurnalistika fakültəsində bakalavr, 2002-ci ildə isə magistratura pilləsini bitirmişdir. O, elmi fəaliyyətini davam etdirərək BDU-da fəlsəfə doktoru və filologiya elmləri doktoru elmi dərəcələrini almış, bir neçə dərsliyin və 40-dan çox elmi məqalənin müəllifidir. O, həmçinin müxtəlif ali təhsil müəssisələrində pedaqoji fəaliyyətlə məşğul olmuşdur.
Peşəkar media karyerasına "Lider TV"də başlayan R. Məmmədov orada idman müxbiri, reportyor, idman şərhçisi və 2010-cu ildən İdman redaksiyasının rəhbəri kimi müxtəlif vəzifələrdə çalışmışdır. 2015-ci ildən sonra AzTV-də “Günün nəbzi”, “Əsas Məsələ” və “Həftə” kimi ictimai-siyasi verilişlərin aparıcısı olmuşdur.
AzTV QSC-nin sədri kimi Rövşən Məmmədovun rəhbərliyi ilə televiziya kanallarının texniki təchizatının yenilənməsinə diqqət ayrılmış, AzTV 2021-ci ildən etibarən HD formatında yayıma başlamışdır. Onun idarəçiliyi dövründə telekanalda onlarla yeni layihə və bədii-sənədli film ərsəyə gətirilmişdir. Jurnalistikanın inkişafındakı xidmətlərinə görə 2015-ci ildə “Tərəqqi” medalı ilə təltif edilmişdir.
