Azərbaycanın paralimpiya üzgüçüləri

Azərbaycan paraüzgüçüləri Yay Paralimpiya Oyunlarında indiyədək ölkəmizə ümumilikdə 5 qızıl və 7 gümüş medal qazandırıblar. Son illər Azərbaycanda paraüzgüçülüyün inkişafı və bu idman növünün daha geniş yayılması istiqamətində mühüm işlər görülür. Bu sahədə keçirilən ilk ölkə çempionatı paraüzgüçülüyün kütləviliyinin artırılması, yeni istedadların üzə çıxarılması və gənc idmançıların peşəkar hazırlığının gücləndirilməsi baxımından əlamətdar hadisə olub. Çempionatda iştirak edən yeniyetmə paraüzgüçülər Əli Vəliyev və Murad Məmmədov da diqqət çəkən idmançılar arasında yer alıblar. Hər iki idmançı artıq beynəlxalq yarışlarda Azərbaycanı təmsil edib və gələcəkdə ölkəmizi paraüzgüçülük üzrə beynəlxalq arenada layiqincə təmsil edə biləcək perspektivli idmançılar olduqlarını nümayiş etdiriblər.