IV Beynəlxalq Minatəmizləmə Konfransının ikinci günü

Bakıda IV Beynəlxalq Minatəmizləmə Konfransının ikinci günü başlayıb Azərbaycan Respublikasının Minatəmizləmə Agentliyi (ANAMA) və Birləşmiş Millətlər Təşkilatının (BMT) Azərbaycandakı nümayəndəliyinin birgə təşkilatçılığı ilə keçirilən IV Beynəlxalq Minatəmizləmə Konfransının ikinci günü başlayıb. “Şəhərlərin bərpası üçün humanitar minatəmizləmə: Təhlükəsiz yaşayış məskənləri üçün mükəmməllik standartlarının müəyyənləşdirilməsi” mövzusuna həsr olunan konfransın ikinci günündə bir sıra panel müzakirələrinin keçirilməsi nəzərdə tutulub. Gün ərzində “Minalardan təsirlənmiş şəhərlərin bərpasında siyasət inteqrasiyası”, “Texnologiya və innovasiya: daha təhlükəsiz və daha effektiv humanitar minatəmizləmə üçün” və “Ölkə nümunəsi təqdimatları: Humanitar mina fəaliyyətində milli təcrübələr və öyrənilən dərslər” mövzularında panellər təşkil olunacaq. Müzakirələrdə müxtəlif ölkələrdən olan mütəxəssislər, eləcə də yerli və xarici rəsmilər çıxış edəcəklər. Konfransın əsas məqsədi Azərbaycanın mina problemini beynəlxalq ictimaiyyətə çatdırmaq, humanitar minatəmizləmə sahəsində beynəlxalq tərəfdaşlığı gücləndirmək, mina təhlükəsinin aradan qaldırılmasının təhlükəsiz və dayanıqlı bərpa prosesində rolunu müzakirə etmək, innovativ yanaşmalar və qabaqcıl təcrübə mübadiləsini təşviq etmək, həmçinin mina təhlükəsinin aradan qaldırılması istiqamətində beynəlxalq səylərin səfərbər edilməsinə töhfə verməkdir. Bakıda keçirilən IV Beynəlxalq Minatəmizləmə Konfransında ümumilikdə 60 ölkədən 400-dən çox nümayəndə iştirak edir. Konfransın yekununda bəyanatın qəbul edilməsi planlaşdırılır.