Bakı Konqres Mərkəzində keçirilən IV İqlim Həftəsi

Bakıda Azərbaycan Xarici İşlər Nazirliyinin təşkilatçılığı ilə BMT-nin İqlim Dəyişmələri üzrə Çərçivə Konvensiyasının (UNFCCC) IV İqlim Həftəsi öz işinə başlayıb. Sentyabrın 11-dək davam edəcək tədbirin ilk günü “Enerji keçidi, iqlim maliyyələşməsi və sənaye karbonsuzlaşdırılması” mövzusuna həsr olunub. Gün ərzində enerji keçidi, yaşıl enerji, metanın azaldılması və karbon bazarları ilə bağlı sessiyaların keçirilməsi nəzərdə tutulub. Azərbaycan Prezidentinin iqlim məsələləri üzrə nümayəndəsi Muxtar Babayev tədbirdə çıxış edərək İqlim Həftəsinin iqtisadiyyat və iqlim gündəliyində dəyişikliklərə təkan verəcəyini bildirib. O qeyd edib ki, dünyada yanğınlar, qida və səhiyyə problemləri, eləcə də təbii fəlakətlər artır və iqlim dəyişmələri bu proseslərdə mühüm rol oynayır. M.Babayev iqlim dəyişikliyi ilə mübarizədə Xəzər dənizi ölkələri arasında əməkdaşlığın gücləndirilməsinin vacibliyini vurğulayıb. Onun sözlərinə görə, Azərbaycan üçün iqlim gündəliyi həm də siyasi əhəmiyyət daşıyır. BCAW 2026 çərçivəsində siyasətçilər, biznes və maliyyə sektoru, alimlər, akademik dairələr, vətəndaş cəmiyyəti, gənclər və beynəlxalq təşkilatların nümayəndələri bir araya gələcək. Tədbirdə iqlim maliyyələşməsi, regional əməkdaşlıq, innovativ texnologiyalar, uyğunlaşma və dayanıqlı inkişaf məsələləri müzakirə olunacaq.