beynəlxalq səyyah

Beynəlxalq səyyah, xüsusən də "Most Traveled People" (MTP), "Extreme Traveler International Congress" (ETIC) və "NomadMania" kimi aparıcı klubların üzvləri qlobal miqyasda böyük nüfuza malikdirlər. Bu şəxslər yüzdən çox ölkəni ziyarət edərək, adətən kütləvi turizm marşrutlarından kənarda qalan bölgələrə maraq göstərirlər. Azərbaycanın işğaldan azad edilmiş Qarabağ və Şərqi Zəngəzur əraziləri beynəlxalq səyyahlar üçün əsas "qara turizm" (dark tourism) istiqamətlərindən birinə çevrilib. Vətən müharibəsindən sonra mütəmadi olaraq təşkil edilən səfərlərdə onlarla ölkədən yüzlərlə səyyah iştirak edir. Bu səfərlərin məqsədi Ermənistan tərəfindən törədilmiş dağıntıların miqyasını beynəlxalq ictimaiyyətə çatdırmaq, eyni zamanda Azərbaycan dövlətinin həyata keçirdiyi sürətli və unikal quruculuq-bərpa işlərini yerində müşahidə etməkdir. Beynəlxalq səyyahlar sosial media platformalarında milyonlarla izləyicisi ilə bölgənin inkişafı və sülhə qovuşması barədə həqiqətləri yayırlar.